«Еуропадағыдай жасадық»: Бөрібаев «Ордабасыға» қарсы матчтағы пенальтидің құпиясы туралы

«Оқжетпестің» жартылай қорғаушысы Нұрғайни Бөрібаев ASnews.kz сайтына берген сұхбатында ҚПЛ-дың 25-турында көшбасшы «Ордабасыдан» (2:1) басым түскеннен кейінгі әсерімен бөлісіп, 11 метрлік айып добын орындау кезіндегі команданың тактикалық қулығы туралы айтып берді.

Матчтағы эмоция мен бапкердің нұсқауы туралы

«Эмоция өте керемет, мұны сөзбен жеткізу мүмкін емес. Бойымызды түрлі сезім кернеп тұр: қайғы да, қуаныш та, бәрі де болды. Бірінші таймнан кейін бапкер қарқынды ары қарай күшейту керектігін айтты. Алғашқы 45 минутты біз тамаша өткіздік, тек өз мүмкіндігімізді күтуіміз керек болды. Нәтижесінде 2:1 есебімен маңызды жеңіске жеттік».

Еуропалық стильдегі пенальти туралы

Ойын барысында Бөрібаев пенальтиді сәтті орындап, таразы басын теңестірген болатын. Алайда соққы алдында допты шабуылшы Бектемір Абдуманнонов ұстап тұрды. Жартылай қорғаушы бұл әрекеттің сырын былай түсіндірді:

«Пенальти сәтіне келсек, бұған дейін біз мұндай тәсілді қолданбаған едік. Бірақ осы жолы Бектемірге допты ұстай тұруын өтіндім. Еуропада мұндай әдіс негізгі пенальти тебушіге қарсылас қақпашысы тарапынан психологиялық қысым көрсетілмеуі үшін жасалады. Біздің шешіміміз де осындай болды».

Жанкүйерлерге алғыс

«Көкшетаудағы атмосфера өте керемет! Осындай атмосфера жылдан-жылға арта береді деп үміттенемін. Стадионға келіп қолдаған барша жанкүйерлерге зор алғысымызды білдіреміз», – деді Бөрібаев.

Естеріңізге сала кетейік, Қазақстан премьер-лигасының 25-туры аясында көкшетаулық «Оқжетпес» өз алаңында шымкенттік «Ордабасыны» 2:1 есебімен қапы қалдырды. Алаң иелері сапынан Нұрғайни Бөрібаев пенальтиден гол соқса, екінші таймда Леонарду Де Ассунсау бұрыштамадан келген допты қақпаға дәл бағыттап, командасына жеңіс сыйлады. Бұған дейін «Оқжетпестің» бас бапкері Ринат Алюетов пенальти кезіндегі бұл қулықтың қақпашы Бекхан Шайзаданың қысымын азайту үшін алдын ала жоспарланғанын айтқан болатын.

«Төрешілікке шағымданатын олар емес»: Алюетов – «Ордабасыны» жеңгені және хейтерлер туралы