inDrive компаниясының басшысы Томский әділетсіздікке байланысты Қазақстанда футбол клубын сатып алудан бас тартты

inDrive халықаралық сервисінің негізін қалаушы әрі иесі Арсен Томский жанкүйерлердің Қазақстан премьер-лигасындағы клубтардың бірін әлеуметтік жоба ретінде өз қамқорлығына алу туралы ұсынысына жауап берді, деп хабарлайды ASnews.kz.

Threads әлеуметтік желісінде кәсіпкерге отандық спортқа инвестиция салу ұсынылды:

«Премьер-лигадағы қазақстандық бір футбол клубын әлеуметтік жоба ретінде өз қолыңызға алыңызшы, халықтың қолдауы одан да арта түседі».

Дегенмен кәсіпкер бұл идеяға күмәнмен қарап, бас тарту себебін қысқа қайырды:

«inDrive мақсаты – әділетсіздікті азайту. Футбол мұнымен ұштаспайды», – деп жазды сапарларға тапсырыс беру және басқа да қалалық қызметтер сервисі inDrive-тың негізін қалаушы Томский.

Қазақстанда кәсіпқой футбол клубтарын жеке секторға беру науқаны жалғасуда. Қазіргі уақытта ҚПЛ мен бірінші лиганың бірқатар командалары жеке қолға өтіп үлгерді. Олардың қатарында алматылық «Қайрат» (Қайрат Боранбаев), астаналық «Жеңіс» (Михаил Ломтадзе), қарағандылық «Шахтер» (Тимур Турлов), шымкенттік «Ордабасы» (Шахмұрат Муталип), «Ақтөбе» (Нұрлан Артықбаев), «Атырау» (Болат Қонарбай), қызылордалық «Қайсар» (Исламғали Қозбақов) және петропавлдық «Қызылжар» (Сергей Кан) бар. Бұдан бөлек, жаңа инвесторға берілмес бұрын ақтаулық «Каспий» аудиторлық тексерістен өтуде.

Покатиловтың «Сабахы» Чемпиондар лигасында: қазақстандық қақпашы Әзербайжан футболының тарихына қалай енді