«Тобылдың» марокколық легионері – «Ордабасыдан» жеңілгені туралы: жекелеген сәттер шешіп кетті

Марокколық жартылай қорғаушы Амин Талал Қазақстан Премьер-лигасының 20-туры аясында «Ордабасымен» болған матчтан кейін ASnews.kz тілшісіне ойын туралы пікірін білдірді.

«Ойын жақсы өтті, стадиондағы атмосфера да керемет. Біз үшін бұл өте ауыр кездесу болды. Бірнеше қателік жібердік. Әрине, бұдан да жақсы нәтижеге қол жеткізгіміз келді, бірақ матч тағдырын жекелеген сәттер шешіп кетті. Өкінішке қарай, жеңіліп қалдық. «Ордабасыға» алдағы ойындарда сәттілік тілеймін. Олар да өте сапалы ойын көрсетті», – деді Талал.

Сондай-ақ марокколық футболшы Қазақстан чемпионатының деңгейіне де жоғары баға берді.

«Шынымды айтсам, Қазақстан чемпионатының деңгейі өте жоғары. Мұнда чемпиондық үшін таласып жүрген «Қайрат» пен «Ордабасы» сияқты мықты командалар бар. Тіпті белгілі бір қиындықтарға қарамастан, «Астананың» құрамы мықты жасақталған. Қайталап айтамын, лиганың деңгейі расында өте жоғары», – деді ол.

Қазақстан Премьер-лигасының 20-турында Қостанайдың «Тобылы» сырт алаңда шымкенттік «Ордабасыдан» 0:2 есебімен жеңіліп қалды.

Амин Талал бұған дейін Молдованың «Шериф», Ресейдің «Ахмат» және Францияның «Бастия» клубтарында доп тепкен.