Әдепсіз қылық: «Қайрат»–«Ордабасы» матчындағы жанжалдың себебі белгілі болды

ҚПЛ-дың 19-турындағы «Қайрат» пен «Ордабасы» арасындағы орталық матчтың (2:1) соңғы минуттарында үлкен жанжал туындады.

Алматылықтардың бас бапкері Рафаэль Уразбахтин қарсыластардың қосалқы құрам орындығына қарай ашумен ұмтылған, алайда жанжалға қатысушыларды уақытылы ажыратып, бапкерді тоқтатып үлгерді.

ASnews.kz-ке белгілі болғандай, бапкердің мұндай ашуына шымкенттіктердің македониялық қорғаушысы Алекса Амановичтің арандатушылық әрекеті себеп болған. Ойынның соңғы минуттарында «Ордабасы» гол соққаннан кейін, қосалқы құрам орындығында отырған футболшы «Қайраттың» бапкерлер штабына қарата әдепсіз ым-ишара жыныс мүшесін бейнелеп жасаған.

Ойыннан кейінгі баспасөз мәслихатында «Қайраттың» бас бапкері бұл жағдайды жұмсартып, оны ойын үстіндегі эмоциямен түсіндіруге тырысты:

«Матчтан кейінгі жанжал ма? Бұл – эмоция, ойын қыза түскенде эмоцияның өршитіні түсінікті. Ойыннан кейін біз бір-бірімізге қол бердік. Бұл – әдеттегі эмоциялар».

Еске сала кетейік, «Қайрат» 2:1 есебімен принципиалды жеңіске жетіп, ҚПЛ турнирлік кестесінің көш басына шықты.

ҚФФ «Ұлытау»–«Ертіс» матчына тексеріс жүргізеді