«Ордабасы» допқа көбірек иелік етті, бірақ ең бастысы – жеңіс»: «Қайрат» легионері ҚПЛ-дағы бәсеке жайлы

Алматылық «Қайраттың» қорғаушысы Луиш Мата ASnews.kz сайтына берген сұхбатында шымкенттік «Ордабасымен» өткен ойынды (2:1) қорытындылады, сондай-ақ:

• тығыз кестедегі команданың физикалық бабын бағалады;
• жанкүйерлерді «Омонияға» қарсы ойынға шақырды;
• және команданың жаңа ойыншысы Гуштавудың бейімделуіне қалай көмектесіп жатқанын айтып берді.

«Ордабасыны» жеңгені және тығыз кестеден кейінгі шаршау туралы

«Иә, арасында тек үш-төрт күннен ғана демалатын бірнеше матч өткіздік. Әрине, шаршағанымыз анық. Бірақ бүгінгі ең басты мақсат – үш ұпайға қол жеткізу еді.

Алдымен гол соғып, содан кейін қорғаныста барынша жинақы ойнауға тырыстық. «Ордабасы» допқа көбірек иелік еткенімен, нәтижесінде біз жеңіске жеттік. Шымкенттіктер соңғы матчын өткен аптада өткізген болатын, ал біз үш күн бұрын ғана алаңға шықтық. Алматыдан тыс жерде 11 күнде ауыр ұшуларды бастан өткеріп, үш шаршатарлық ойын өткіздік. Сондықтан ең бастысы – жеңіске жетіп, бірінші орынға шығу еді. Өте қуаныштымыз».

«Омонияға» қарсы сапар және Алматыдағы қарымта матч туралы

«Кипрде «Омонияға» гол соға алмадық. Футболда мұндай болып тұрады. «Омония» – өте мықты команда. Былтыр «Пафосқа» қарсы ойнағанымыз естеріңізде шығар? «Омония» ішкі чемпионатта сол «Пафостың» өзінен 25-тен астам ұпайға озып кетті, бұл – өте қарсылас. Оларда ойыншы алаңнан қуылып, сан басымдығымен ойнағанда да бізге оңай болған жоқ. Мүмкіндіктер болды, бірақ, өкінішке қарай, реализация нашар болды.

Енді бәрін талқылап, бейнежазбаларды қарап, қорытынды шығарамыз. Бірақ ең бастысы – күшті қалпына келтіру. Енді жауапты матчқа дейін алдымызда екі күн бар. Стадионда бізге жанкүйерлердің қолдауы судай қажет – былтыр олар бізге орасан зор серпін мен қосымша қуат берді. Трибуналар қайтадан лық толады деп үміттенемін».

Жаңадан келген Гуштавудың бейімделуі

«Иә, әрине, Гуштавудың бейімделуіне көмектесіп жатырмыз. Мен, Жоржиньо және португал тілінде сөйлейтін басқа да жігіттер оған белсенді түрде қолдау білдірудеміз – онымен тіл табысу осылай жеңілірек. Жалпы оған бәрі көмектеседі: командаластары, бапкерлер штабы, персонал.

Бүгін ол керемет кездесу өткізді. Енді бабын арттыруы керек, өйткені Португалияда ол тек маусымалды дайындықтан өтіп жатқан еді. Біз оның тезірек өзін өз үйіндегідей сезінуі үшін бәрін жасаймыз», – деді Мата.

Еске сала кетейік, ҚПЛ-дың 19-турындағы орталық матчта «Қайрат» өз алаңында «Ордабасыны» 2:1 есебімен жеңді (голдар: Гуаль 14', Юккола 87' – Йонсен 93') және 45 ұпаймен премьер-лига жарыс кестесінің көш басына шықты. Шымкенттіктерде (43 ұпай) әлі бір ойын қоры бар.

Қоса кетейік, Чемпиондар лигасының екінші квалификациялық раундындағы Кипрдегі алғашқы кездесу «Қайраттың» 0:1 есебіндегі жеңілісімен аяқталған. Келесі кезеңге шығу үшін өтетін жауапты матч 29 шілдеде Алматының Орталық стадионында өтеді.

ҚФФ «Ұлытау»–«Ертіс» матчына тексеріс жүргізеді

«Қазақстан ӘЧ-ге шығу үшін адамдар футболды сүюі керек»: Йонсен – «Қайратпен» өткен матч және алтын үшін талас туралы