Ресейлік сарапшы – «Ақтөбенің» жаңа бапкері туралы: Черевченконың тұсында тәртіп болады

Eurasia Football жобасының авторы әрі Орталық Азия футболы бойынша сарапшы Александр Троицкий ASnews.kz сайтына берген сұхбатында Игорь Черевченконың «Ақтөбе» бас бапкері лауазымына тағайындалуына қатысты пікір білдірді.

Черевченконың пайдасына жасалған таңдау туралы

«Бұл маусымда «Ақтөбе» бәрін байқап көрген сияқты: Костов та, Таркович та, Ерімбетов те болды. Тарковичке қатысты мен басынан-ақ күмәнданған едім – Eurasia Football-дағы словак маманының келуі туралы «Мен талап етемін, ал олар орындамайды» деген материалым, негізінен, көріпкелдік болып шықты. Ол да Қазақстанды түсінбеді, оны да мұнда түсінбеді.

Маған «Ақтөбе» басында жергілікті маманды көру қызық болар еді – мысалы, сол Ерімбетовке мүмкіндік беруге болатын еді. Бірақ Черевченко – ең жаман нұсқа емес».

Маманның біліктілігі

«Біріншінден, Игорь Геннадьевичке бейімделудің қажеті жоқ: оның өзі Орталық Азиядан, Тәжікстанның тумасы, «Истиклолда» үш маусым жұмыс істеді.

Екіншіден, Черевченконың біліктілігі күмән тудырмайды. Ол Сёминнің «Локомотивінен» шыққан. Клубта көп жылдар бойы бапкер, соның ішінде бас бапкер ретінде де қызмет етті, Ресей кубогын жеңіп алды. «Балтика», «Факел», Туланың «Арсеналы» және «Химки» клубтарын өте лайықты басқарды – ол туралы Ресей мен Тәжікстанның футбол ортасында өте жақсы пікірлер айтылады, сөзіне берік адам.

Бұдан бөлек, ол «Истиклолмен» бірге Тәжікстан чемпионатының алтынын үш рет жеңіп алды, ал команда Азия Чемпиондар лигасында лайықты өнер көрсетіп, Катар мен Иран чемпиондарымен, сондай-ақ Криштиану Роналду ойнайтын сауд Арабиясының «Әл-Насрымен» кездесулерде ұпай еншіледі».

Жалғыз осал тұсы туралы

«Шынында, бір «бірақ» бар. Черевченконың футболы прагматикалық: қорғаныстан шабуылға жылдам өтуге негізделген. Бұл «Ақтөбенің» футболына толық келе бермейді, яғни Тарковичтікімен шамалас.

Әрине, командада тәртіп көбірек болады, Черевченко футболшыларға түсініктірек болып, оларға жол табады деп болжаймын. Дегенмен «мухановтық» футболды күтудің керегі жоқ», – деді сарапшы.

51 жастағы ресейлік-тәжікстандық маман Игорь Черевченко «Ақтөбенің» жаңа бас бапкері атанады. Келісімшарт келесі маусымға ұзарту мүмкіндігімен жыл соңына дейін келісілді.

Мансабында Черевченко мәскеулік «Локомотив», Туланың «Арсеналы», «Химки», калининградтық «Балтика», воронеждік «Факел» және тәжікстандық «Истиклол» клубтарын басқарған.