Карповичтің ассистенті – «Ордабасыдан» жеңілуі туралы: бізге Оразов жетіспеді

Семейлік «Елімайдың» бас бапкерінің ассистенті Евгений Коструб «Ордабасыдан» жеңілгеннен кейін (1:3) құрамдағы үлкен шығындар мен футболшылардың шаршауын түсіндірді, деп хабарлайды ASnews.kz.

Матчтың қиындығы, шаршау және тактика туралы

«Өте қиын матч болды – нәтиже жағынан да, жұмсалған күш-жігер тұрғысынан да. Маған біз шаршап қалғандай болып көрінді. Иә, ойынды қайта қарау керек болады, бірақ небәрі екі күн бұрын ойнағаннан кейін алаңға физикалық әрі функционалды түрде дайын болып шығу қиын.

Біз төменгі блокпен ойнауды жоспарлаған жоқпыз. Мүмкін бұл бірнеше эпизодта орын алған шығар, бірақ ойын жоспары ретінде ондай нәрсе мүлде болған жоқ. Чемпионат жалғасып жатыр, біз келесі кездесуге дайындалуымыз керек».

Кадрлық шығындар мен Оразовтың жоқтығы

«Біз құрамға байланысты белгілі бір қиындықтарға тап болған кезеңдеміз. Түрлі жағдайларға байланысты капитан Рамазан Оразовтан айырылдық, Жан-Әли Пайруз шеттетілген, ал Никита Пивкин ауыр жарақат алды.

Команда капитаны әрі ұлттық құраманың басты ойыншысы қатардан шығып қалғанда – бұл үлкен шығын. Әрине, мұндай ойында бізге Рамазан Оразов жетіспеді».

Байғалиевтің негізгі құрамда шығуы

«Бүгін біз жас ойыншымыз әрі Семей футболының түлегі Байғалиевке сенім артуды ұйғардық. Негізгі құрамда алғаш рет шыққаны үшін ол қалыпты ойнады деп есептейміз.

Әрине, белгілі бір қобалжу болды, бәрі де мұндай кезеңнен өтеді. Оның өте қабілетті әрі еңбекқор екені – 100 пайыз шындық», – деді Коструб.

ҚПЛ-2026 маусымының 18-турында «Ордабасы» өз алаңында «Елімайды» 3:1 есебімен ұтты. Шымкенттіктер сапынан Йонсен, Килама және Астанов (пенальтиден) мергендік танытса, қонақтардың жалғыз добы Плакканың еншісінде.

Бұл жеңіс «Ордабасыға» 43 ұпаймен (қосалқы матчы бар және «Қайраттан» бір ұпай алда) бірінші орынға қайта көтерілуге мүмкіндік берді. «Елімай» 26 ұпаймен жетінші орында келеді.

Мартин – «Елімайды» жеңгені туралы: өткізіп алған голда айыптылар жоқ