«Ордабасы» президенті: Аманович, Абагна, Кейта және Нательдің трансферіне ақша жұмсадық

«Ордабасы» клубының президенті Дархан Қызайбаев қай ойыншылардың трансферіне ақша жұмсағанын айтты, деп хабарлайды ASnews.kz.

«Амановичті 200 мың долларға сатып алдық. Йонсен мен Килама еркін агент ретінде келді. Сатып алған ойыншылардың қатарында Давид Абагна (АПОЭЛ) мен Тидиан Кейта (Петролул) бар. Және Кипрдің АЕЛ клубынан Лео Нательді сатып алдық», – деді Қызайбаев Нұрсұлтан Құрманға берген сұхбатында.

Сондай-ақ Марк Гуальдің орнына неліктен Бьорн Йонсенді алғанын түсіндіріп берді:

«Көп адамдар неге Гуальді алмадыңдар деп сын айтуда. Ол ойыншыны бізге ұсынды. Бірақ онымен нақты келіссөз жүргізбедік. Себебі Гуаль таза тоғыздықта ойнайтын шабуылшы емес, ондықтың позициясында да өнер көрсетеді. Ал біздің ойын стилімізге Йонсен секілді әуедегі доптарды голға айналдыратын, керек жерде аяғын қойып қалатын таза шабуылшы қажет болды. Себебі бізде ондықтың позициясында ойнайтын Эльхан Астанов, Жасұлан Әмір және басқа да ойыншылар бар».

34 жастағы норвегиялық шабуылшы Бьорн Йонсен «Ордабасыға» ауысқалы бері 6 матч өткізіп, 4 гол мен 1 нәтижелі пастың авторы атанды.