Ермұхаммед Мәулен: ҚПЛ-дағы әр үш матчтың бірі келісілген түрде өтіп жатыр

Қазақстан ұлттық құрамасының бұрынғы баспасөз хатшысы Ермұхаммед Мәулен ҚПЛ-дағы келісілген матчтар жайлы айтты, деп хабарлайды BorodAbata.kz.

«Мені футбол клубтары сотқа бергісі келген. Бірақ бас тартып, райынан қайтты. Олар келісілген матч ойнап жатыр. Бірақ менде оны дәлелдейтін фото, видео, аудиолар жоқ. Нұрсұлтан Құрман менің осы айтқандарымды этикаға жатпайды деп пікір білдірді. Ал Қазақстан футбол федерациясының президенті парламентте сұхбат беріп, әлемде келісілген матчтар бойынша төртінші орындамыз деп мәлімдеген. Бұл – факт. Мұны жарты әлем біледі. Федерация президенті айтып отырса, бұл рас ақпарат қой, демек.

Шындығында келгенде, қазір үш матчтың бірі келісілген түрде өтіп жатыр. Қарапайым жанкүйерлер не болып жатқанын білмейді. Төреші қателесті, қақпашы тоса алмай қалды деп ойлайды. Сценарийден бейхабар адамдар үшін бұл қызық болып көрінуі мүмкін», – деді Мәулен Sadaq Media ютуб-арнасына берген сұхбатында.

Ермұхаммед Мәулен бірнеше апта бұрын ҚФФ-дағы қызметінен кеткен болатын.