«Ордабасы» президенті – Шымкенттегі жаңа стадион туралы: сыйымдылығын 60 мыңға арттырғымыз келеді

«Ордабасы» клубының президенті Дархан Қызайбаев Шымкентте салынып жатқан жаңа стадионның өзгеріске ұшырайтынын жеткізді, деп хабарлайды ASnews.kz.

«Жаңа стадионды өзіміз салғымыз келеді. Оның қазіргі сыйымдылығы 35 мың, ал біз 60 мыңға ұлғайтуды жоспарлап отырмыз. Себебі 55 мыңдық стадион Ташкентте де, Бішкекте де бар. Орталық Азиядағы экономикасы дамыған ел біз болғандықтан, үлкен стадион керек.

Қазір әкімдікпен, стадионның қазіргі мердігері Qazaq Stroy компаниясымен үш жақты келіссөз жүргізудеміз. Болашақта стадионды әкімдік пен біздің Integra компаниясы салады деген ойымыз бар. Келіссөздер аяқталса, бірден стадион құрылысын бастаймыз. Қанша қаражат кететіні әзірге белгісіз. Алдымен стадионның жобасын өзгертуіміз керек. Құрылыс жұмыстары әкімдік қаржысымен басталады, жетпегенін өзіміз қосамыз», – деді Қызайбаев Нұрсұлтан Құрманға берген сұхбатында.

Сондай-ақ Дархан мырза стадионмен бірге академия құрылысын бастайтынын да мәлімдеді:

«Оған қоса, 1000 адамға арналған академия салу жоспарда бар. Бірақ қай клубтың үлгісіне сүйенуді ойланудамыз. Қазір «Реал» президенті Флорентино Переске хат жолдап қойдық және «Барселона» академиясымен де келіссөз жүргізудеміз. Бұйырса, «Реал», «Барселона» немесе ПСЖ академиясын Шымкентке әкелуіміз мүмкін.

Англия мен Германиядағы футболшылардың бойлары ұзын, физикасы мықты болады. Ал бізге Испания мен Португалияның стилі сай келеді».

Қазір Шымкенттегі жаңа стадионның құрылысымен Qazaq Stroy компаниясы айналысуда. «Ордабасының» жаңа қожайыны Шахмұрат Мүтәліп иелік ететін Integra Construction да құрылыспен айналысатын компания болып саналады.