Томасов – «Астанадағы» қаржылық қиындықтар жайлы: бізді «өлтіру» кімге тиімді екенін түсінбеймін

Тамыз айында 39 жасқа толатын хорватиялық футболшы Марин Томасов «Астанадағы» қаржылық қиындықтар туралы пікір білдірді, деп хабарлайды ASnews.kz.

«Айына 100 мың теңге жалақы алатыныма сенбейтіндер болса, жеке келсін, есепшотымды көрсетемін. Егер жаңа инвесторлар келіп жатса, бұл мәселе жайлы сөйлесеміз. Бірақ бұл мәселе ертең шешіле, мүлдем шешілмей қала ма, белгісіз. Құдай қаласа, жағдай реттелетін шығар. Мәселе мейлінше тезірек шешілгені дұрыс.

«Астананы» өлтіру кімге тиімді екенін түсінбеймін. Бұл мен үшін таңқаларлық жағдай. Біреу «Астана» клубын өздеріне кедергі ретінде көретін секілді. Біз жеті рет чемпион болдық, қанша мәрте еурокубокта ойнадық, Чемпиондар лигасына шықтық. Біздің 10 жыл бұрынғы нәтижені «Қайрат» енді ғана қайталап жатыр. Бұл үшін оларға қошемет көрсетсек болады», – деді Томасов Эльдар Аманбаевқа берген сұхбатында.

«Астана» ҚПЛ-дағы соңғы ойынында «Ақтөбені» 3:2 есебімен тізе бүктірді. Ал оған дейін Албанияға барып, Конференция лигасының алғашқы матчында «Динамо Ситиді» 1:0 есебімен ұтып келді.

Елордалықтар «Динамо Ситиге» қарсы жауапты кездесуін 16 шілдеде «Астана Аренада» өткізеді.