Кенжебектің агенті – «Бетис», «Ақтөбе» және Еуропа туралы: «Елімай»? Түк те қорқынышты емес

Қазақстан құрамасының ойыншысы Ғалымжан Кенжебектің «Елімайға» келуі жазғы трансфер кезеңіндегі ең күтпеген ауысым болды. 22 жастағы футболшыға басқа да еуропалық клубтар қызыққанымен, ол «Кощицеден» кетіп, небәрі 1 жылдан кейін ҚПЛ-ға қайта оралды.

BorodAbata.kz сайтына берген сұхбатында оның агенті Мамука Ломидзе маңызды сұрақтарға жауап берді.  

– Кенжебектің Қазақстанға оралатынын ешкім күтпеді. Неліктен осындай шешім қабылданғанын айта аласыз ба?

– Бұл бірлесіп қабылданған шешім. Біз «Елімайды» таңдадық, өйткені Ғалымжанға олардың бапкері қызығушылық танытты. Бұл футболшы үшін жағымды жаңалық және оның дамуына оң әсерін тигізеді. Мен бұл трансферге қатысты ешқандай мәселе көріп тұрған жоқпын – еурокубоктағы орын үшін күресетін мықты команда, сондықтан Кенжебек оларға осы мақсатқа жетуге көмектеседі деп сенемін. Тек жарақат алмаса болды. 

– Басқа қандай елдерден қызығушылық болды?

– Қазір ол көптеген клубтардың радарында жүр: испаниялық клубтардан бастап, Чесноковпен келіссөздер жүргізіп жатқан «Хартсқа» дейін қызығушылық танытты. Біз шотландиялық клубпен сөйлесіп көрдік, бірақ әзірге олардың бұл позицияда ойнайтын футболшысы бар, сонда да біз олардың шорт-листінде қала береміз. Ғалымжан бұл клубқа біраз уақыттан кейін қосылатын шығар, бәлкім.

Сондай-ақ Словакиядан ұсыныстар түсті, бірақ біз үшін тиімсіз болды. Ғалымжанның болашағы жарқын болатынына сенімдіміз, көзді тарс жұмып, Еуропаны таңдау міндетті емес. Мен «Елімаймен» келісімшартқа отырып, дұрыс әрекет еткенімізге сенімдімін. Премьер-лигада ойнау оңай емес.

– Испания ше? 

– Тек «Бетис» емес, Сегунданың басқа да клубтарынан қызығушылық болды. Олар әлі де бізді бақылап отыр, бірақ нақты ұсыныс келмеді. Сондықтан уақытты ысырап етпеу үшін ҚПЛ клубына ауыстық. Менің ойыншым ұлттық құрамаға пайдасын тигізіп, формада болу үшін тұрақты түрде ойнау қажет. Содан кейін не боларын көре жатармыз. Бізде РПЛ клубтарымен де байланыс бар.

– Семейлік ұжыммен келісімшарт қанша уақытқа есептелген?  

– Бұл құпия ақпарат, бірақ болашаққа арналған шешімді маусым соңында қабылдаймыз. Содан кейін бәрі анық болады. Кенжебек екеуміздің үлкен жоспарларымыз бар.

– Елге оралу деңгейді бір сатыға төмен түсіргендей болмады ма?

– Жоқ, өйткені бұл оңай чемпионат емес. Биыл барлығына қиын болып тұр: қазір сіз ойынның фавориті не аутсайдері екеніңізді түсіне алмайсыз. Барлық командалар күресіп, ұпай алуға тырысады, сондықтан бұл Ғалымжанға тек пайдасын тигізуі керек. Мен бәрі жақсы болатынына сенімдімін. Біз Карпович секілді мықты бапкер жаттықтыратын керемет клубқа келдік.

– «Ақтөбенің» Ғалымжанға ұсыныс тастағаны рас па? 

– Жалпы, Қазақстаннан бірнеше нұсқа болды. Оның ішінде «Ақтөбе» де бар еді. Біз олармен сөйлестік, бірақ бұл жерде Карповичтің құлшынысы басты рөл атқарды. Басқа да ұсыныстар болды, бірақ ең бастысы – біз «Елімайды» таңдадық.