«Ереже бұзылған жоқ, бұл – таза гол»: «Ұлытау» шабуылшысы – «Ордабасыға» қарсы ойындағы төрешінің шешімі туралы

«Ұлытау» шабуылшысы Бақдәулет Зұлфықаров ASnews.kz тілшісіне берген сұхбатында «Ордабасыдан» жеңілгендері (0:1) туралы айтып, бас төрешінің шешімімен келіспейтінін білдірді.

«Шымкентте оңай ойын болмайтынын түсіндік. Өткен турда ғана «Ордабасымен» кездесіп, жақсы футбол көрсеткен едік. Бүгін де, меніңше, жаман ойнаған жоқпыз, бірақ сәттілік біз жақта болмады», – деді Зұлфықаров.

Сонымен қатар, ол алаң иелерінің қақпасына соғылған, бірақ есепке алынбаған голға қатысты эпизодты атап өтіп, матчтан кейін команда бұл сәтті қайта қарап шыққанын жеткізді.

«Ереже бұзу сәтіне келетін болсақ – ойыннан кейін оны қайта көрдік. Меніңше, ол жерде ешқандай ереже бұзылған жоқ, гол таза болды», – деп толықтырды ол.

Бұдан бөлек, шабуылшы Шымкенттегі стадионның атмосферасы мен жанкүйерлердің қолдауын ерекше атап өтті:

«Бұл стадионның атмосферасы жылдан жылға жақсарып келеді. «Техас» фанаттары сырт алаңдағы матчтарға да барып, команданы үнемі қолдайды. Мұндай қолдау – шымкенттік клубтың сәтті өнер көрсетуінің басты себептерінің бірі», – деді Бақдәулет.

Еске сала кетейік, Қазақстан премьер-лигасы аясында өткен «Ордабасы» мен «Ұлытау» арасындағы матч 1:0 есебімен шымкенттіктердің пайдасына аяқталды. «Ордабасы» сапындағы жалғыз әрі жеңіс голын норвегиялық форвард Бьорн Йонсен соқты.

«Ұлытау» шабуылшысы – «Ордабасыға» қарсы ойын жайлы: төреші жұмысымызды қиындатып жіберді