«Ақтөбеде ең үздік жанкүйерлер»: «Каспийдің» ойыншысы «Ордабасыдан» ұтылғаннан кейін мәлімдеме жасады

Ақтаулық «Каспийдің» аргентиналық жартылай қорғаушысы Лео Струмия ASnews.kz тілшісіне берген сұхбатында «Ордабасыдан» (0:2) жеңілгеннен кейін Ақтөбе мен Шымкент стадиондарындағы атмосфераны салыстырды.

«Мен Ақтөбені жақсы көремін. Онда Қазақстандағы ең үздік фанаттар жиналған деп есептеймін. Шымкентте де жақсы жанкүйерлер бар. Бұл екі стадионды салыстыра алмаймын, екеуі де тамаша, бірақ Ақтөбе менің жүрегімде», – деді Лео.

Сонымен қатар футболшы қарсыластың деңгейі туралы да ойын білдірді.

«Олар турнирлік кестенің бірінші сатысында тұр – бұл олардың ойын деңгейін көрсетеді. Бізге жаттығуды жалғастырып, қателіктерді азайту керек. Тіпті бір ғана қателік гол соғылуына алып келеді. Біз әрі қарай да дами түсеміз», – деп толықтырды Струмия.

Еске сала кетейік, ақтаулық «Каспий» Шымкентте «Ордабасыға» 2:0 есебімен есе жіберді. Лионель Струмия 2023-2025 жылдар аралығында «Ақтөбе» сапында өнер көрсеткен. Осы уақыт ішінде аргентиналық легионер «ақ-қызылдар» құрамында барлық додада 58 матч өткізді.