Мәулен – «Алтай» қақпашысы жайлы: ҚПЛ-да ойнап, пенальти тосып жүрген Алиакбарды қалайша жастар құрамасына шақырмайды?

Қазақстандық спорт журналисі Ермұхамед Мәулен «Алтайдың» Қазақстан Премьер-лигасындағы ойындарына шығып жүрген қақпашы Әбілқайыр Алиакбардың Қазақстан жастар құрамасына шақыртылмай жүргеніне таңданысын білдірді, деп хабарлайды ASnews.kz.

«Алтай» сапында пенальти тосқыш Әбілқайыр Алиакбарды неліктен Қазақстан жастар (U21) құрамасына алмайды деген заңды сұрақ туындайды. ҚПЛ матчында ойнап, пенальти тосып жүрген қақпашы қалайша бас бапкердің көзіне түспейді?

Қазір Қазақстан жастар құрамасында Дулат Талыспаев, Шерхан Қалмұрза және Рихардтың баласы бар. Мысалы, «Рихард қай жерде қақпаға тұрып жүр?» деген сұрақ туындамай ма? Ал бір қақпашы ҚПЛ-да ойнап жүр, бірақ ол жастар құрамасына алынбайды», – деді Мәулен «Бірінші бол» арнасындағы подкастта.

20 жастағы Әбілқайыр осы маусымның бастапқы екі матчында алаңға шықты. Кейін Қазақстан кубогында «Ұлытау» және «Ақтөбемен» болған ойынға қатысты. «Ақтөбеге» қарсы матч пенальти сериясына дейін жалғасып, Алиакбар жасаған екі сейвтің арқасында «Алтай» кубоктың жартылай финалына шықты.

Ал 21 жастағы Мирас Рихард осы маусымда «Ертістің» Қазақстан кубогындағы бір ғана ойынына қатысты.