Мәулен – «Астанадағы» қақпашылар бәсекесі туралы: Чондрич легионерлердің арқасында алаңға шығып жүр

Қазақстандық спорт журналисі Ермұхамед Мәулен «Астана» қақпашылары Йосип Чондрич пен Мұхамеджан Сейсен арасындағы бәсекелестік жайында пікір білдірді, деп хабарлайды ASnews.kz.

«Чондричтің алаңға шығу-шықпауына командадағы легионерлер әсер етеді деген әңгімені өткен жылдан бері естіп келе жатырмыз. Яғни, шетелдік ойыншылар Григорий Бабаянмен ақылдасып, өз ойларын айтады екен. Оның ішінде абыройы бар бір ғана ойыншы айта алады.

Екінші жағынан, Чондрич Сейсенге қарағанда аяқпен жақсы ойнайды, еуропалық мектептен өткен, пасы жақсы, орнынан жақсы шыға алады деген әңгімелер бар. Мұхамеджан да аяқпен жақсы ойнайды. Өткен жылы «Жеңіспен» болған ойында жіберіп алған қателігі әлі күнге дейін есінен кетпей жүр. Негізінде, «Жеңіске» қарсы тағы бір ойында Чондрич те қателік жасаған болатын. Сондықтан Мұхамеджанның Чондричтен еш жері кем емес», – деді Мәулен «Бірінші бол» арнасындағы подкастта.

Сейсен осы маусымды «Астананың» негізгі қақпашысы ретінде бастап, алғашқы төрт матчта негізгі құрамнан шықты. Бірақ соңғы он ойынның тоғызында қосалқы құрамда қалды.

Сол себепті Қазақстан құрамасының маусым айындағы ойындарынан да тыс қалды.