Покатилов – «Қайраттан» кетуі туралы: клубта қалуым үшін жалақымды 85 пайызға азайтуым керек болды

Қазақстан құрамасы мен әзербайжандық «Сабахтың» қақпашысы Стас Покатилов ASnews.kz сайтына берген сұхбатында «Қайраттан» кеткен кезін еске алды.

– Қазақстандық футболшылардың көпшілігі «Қайраттан» кеткісі келмейді. Себебі ол жақта барлық жағдай жасалған. Ал сенің клубтан кетуіңнің себебі қандай?

– Иә, «Қайратта» футболшының дамуына барлық жағдай жасалған. Базасы керемет, ондағы жағдай да тамаша. «Қайраттан» кетер кезде маған басқа таңдау қалдырмады. Менің ғана емес, біраз ойыншының келісімшарты аяқталды. Басшылық клубта қалғыларың келсе, жалақыларыңды 85 пайызға азайтасыңдар деген ұсыныс жасады. Мен бірден бас тарттым. Себебі ол кезде балам болды. Әйелім екіншісіне жүкті еді. Азын-аулақ ақшаға ойнаудың ешқандай мән-мағынасы болмады.

Статистикаға қарасақ, мен тәуелсіздік алғаннан кейін «Қайрат» сапында ең көп ойын өткізген қақпашы атандым. Алматылық клубқа ризамын, олардың да маған өкпесі жоқ шығар.

32 жастағы 2016 жылдан 2021 жылға дейін «Қайратта» ойнап, кейін «Ақтөбеге» ауысты.

Әзірбайжан чемпионатының 25 турынан кейін «Сабах» бірінші орында тұр әрі екінші келе жатқан «Қарабахтан» 10 ұпай алда.