ҚПЛ-дың экс-төрешісі «Ордабасы» капитанының әрекеті туралы: Каштру Амановичке ескерту жасауы керек еді

ҚПЛ-дың бұрынғы төрешісі әрі инспекторы Серік Қошқаров ASnews.kz сайтына берген сұхбатында «Ордабасының» капитаны Алекса Амановичті «Тобылға» қарсы 11-турдың орталық матчы алдында бас төреші Антон Кучманың қолын алмай кеткені үшін сынға алды.

«Төреші қандай болмасын, тіпті оған деген сенімсіздік болса да, ойыншылар матч алдында онымен қол алысуға міндетті. Олар жанкүйерлермен қалай амандасуға міндетті болса, төрешілермен де солай амандасуы тиіс. Бұл төрешілер корпусына деген қандай құрметсіздік? Онда матчтарды төрешісіз өткізейік!

Ойын алдында Антон Кучма тиын лақтырады, «Ордабасы» капитаны жеребеде жеңіп, қақпаны таңдайды. Осыдан кейін төреші Амановичке қолын созады, ал ол жай ғана теріс айналып кетеді. Бұл – тәкаппарлық пен ашықтан-ашық құрметсіздік.

Бұл ретте Бақылау-тәртіптік комитеті тарапынан ешқандай реакция болған жоқ. Иә, олар барлық ойындарды қарайды, бірақ көпшілік алдында Амановичке ең болмаса ескерту жасауы керек еді. Сондай-ақ, төрелік ету және инспекциялау департаментінің директоры Нуну Каштру тарапынан да ешқандай әрекет байқалмады», – деді Қошқаров.

Қостанайда «Тобыл» мен «Ордабасы» арасында өткен ҚПЛ-дың 11-тур матчы қонақтардың 3:0 есебімен сенімді жеңісімен аяқталды. Бірінші таймда, 30-минутта Кирилл Глущенков алаңнан қуылып, қостанайлықтар азшылықта қалды. Екінші кезеңде шымкенттіктерге жеңісті Кристиан-Михай Капацинаның голы мен кездесу соңында жас шабуылшы Жасұлан Әмірдің соққан дублі сыйлады.