«Оқжетпестің» украиналық ойыншысы: бір-біріне туған бауырдай қарайтын команда құрып жатырмыз

Көкшетаулық «Оқжетпестің» украиналық қорғаушысы Борис Лотоцкий ASnews.kz тілшісіне берген сұхбатында жаңа клубқа тез бейімделуіне не себеп болғанын айтып берді.

«Командаға біз қалаған нәтижеге қол жеткізуге көмектесе алатыныма өте қуаныштымын. Ал бейімделуге келетін болсақ, бұл жерде біздің ұжым, бапкер, персонал – осы клубпен қандай да бір байланысы бар әрбір адам өте үлкен рөл атқарады.

Мен келген алғашқы күннен бастап біз барлығы бір-біріне туған бауырдай қарайтын өте мықты әрі жауынгерлік қауқары жоғары команда құрып жатырмыз. Мұндай ұжымда жұмыс істеу өте жағымды, бұл – топ деңгей. Сондықтан менің бұл жерде өзімді үйдегідей сезінуіме үлес қосқан әрбір жанға алғыс айтамын», – деді Лотоцкий.

Еске сала кетейік, 23 жастағы украиналық орталық қорғаушы көкшетаулықтар қатарын өткен қыста толықтырған болатын. Премьер-лиганың ағымдағы маусымында Лотоцкий маңызды голдардың авторы атанды: оның еншісінде «Астана» қақпасына соғылған жеңіс голы (1:0), сондай-ақ жақында ғана «Ақтөбемен» болған матчтағы (2:2) командасын жеңілістен құтқарып қалған добы бар.

«Ақтөбеге» гол соққан ойыншы: ойын тағдырын бірінші таймда шешіп тастауға болатын еді