Өзбекстандық скаут – Абдирасулов туралы: «Астана» бапкері шетелдікті емес, қазақты таңдайды

Өзбекстанда жұмыс істейтін ресейлік журналист әрі скаут Николай Егорычев ASnews.kz сайтына берген сұхбатында өзбекстандық ойыншылардың ҚПЛ-дың алғашқы бөлігіндегі өнеріне қатысты пікір білдірді.

Өзбекстандағы ҚПЛ-ға деген қызығушылық

«Қазір ҚПЛ-да бар-жоғы екі өзбекстандық футболшы өнер көрсетеді – Бектемир Абдуманнонов пен Асылбек Абдирасулов. Соңғы бірнеше жылда олардың саны көп еді: Игорь Сергеев, Жасурбек Яхшибоев, Шахбоз Умаров, Бобир Абдихоликов, Иброхимхалил Юлдошев, Одил Абдумажидов және Жасур Жалолиддинов ойнады. Бірі өзін жақсы қырынан көрсетсе, екіншісі төмен деңгейде болды. Кейбірі ҚПЛ-да бірнеше жыл бойы ойнаса, енді бірі тұрақтай алмай, соңында отанына оралды.

Әрине, Өзбекстанда өзбек футболшыларының Қазақстан чемпионатындағы өнерін жіті бақылап отырады. Бұл үлкен қызығушылық тудырады, ойыншылардан ҚПЛ мен Өзбекстан Суперлигасының деңгейін жиі сұрап, оларды өзара салыстыруды өтінеді. Бұл жағдай ҚПЛ клубтарынан Өзбекстанға келетін легионерлерге де қатысты».

Абдуманноновтың «Оқжетпесте» бейімделу мәселелері

«Абдуманнонов бірнеше маусым бойы Өзбекстан чемпионатында өз позициясындағы ең үздіктердің бірі болды. Ол «Әндіжан» сапында ойнап жүргенде жылдамдығымен, дриблингімен және допты айып алаңына жеткізуімен ерекшеленетін. Оның басты ерекшелігі – пастары еді, олар әрқашан дерлік нақты әрі серіктестеріне ыңғайлы болатын. «Әндіжан» үшін өткізген 73 матчта ол тоғыз гол соғып, 20 нәтижелі пас берді. Орташа есеппен – әр матчқа шаққанда шамамен 0,4 нәтижелі әрекет.

Бірақ қазір Бектемир мұндай нәтижемен мақтана алмайды. Оның «Оқжетпеске» маусым барысында қосылғанын және командамен бірге маусымалды дайындықтан өтпегенін ескеру керек. Жаңа жағдайға үйренісу үшін тағы біраз уақыт қажет. Өзбекстан мен Қазақстан чемпионаттарының арасында аз-маз ұқсастықтар бар екенін ескерсек те, жаңа командаға ауысудың өзі футболшы үшін үлкен стресс – тіпті өз елінің ішінде болса да, жаңа чемпионатқа ауысу туралы айтпай-ақ қойса да болады. Маусымның қалған бөлігінде Абдуманнонов көбірек ойын уақытын алып (әзірге ол негізінен қосалқы құрамнан алаңға шығып жүр), «Оқжетпеске» пайдасын тигізетініне сенімдімін. Әрине, бұл оның ең үздік қабілеттері команданың ойын жүйесіне сәтті кіріктірілген жағдайда ғана жүзеге асады», – деп мәлімдеді маман.

Неліктен Абдирасулов «Астанада» ойнамай жүр?

«Абдирасуловқа келетін болсақ, ол әзірге «Астана» сапында 90 минуттан аз ойнады. Футболшы қаншалықты талантты болса да, 5-10 минутқа алаңға шығып, өзін көрсету қиын. Ойыншы ырғақты сезінуі керек. «Астана» – Асылбек үшін ересек деңгейдегі алғашқы клуб, команда өз алдына үлкен мақсаттар қояды. Абдирасулов мұндай жағдайда бұрын-соңды болмаған. Оның үстіне, «Астана» құрамында оның позициясында ойнайтын жас ойыншы – Мақсат Абраев бар. Тең жағдайда таңдау әрқашан көрші елден келген легионерге емес, «өз» ойыншысына түседі».

Жас легионерлердің болашағы

«Абдирасуловқа өз қабілетін дәлелдеп, ойын уақытын жеңіп алуға тура келеді. Бұл Асылбек үшін үлкен сынақ әрі оның есейе түсуіне мүмкіндік береді. Бәсекелестік әрдайым дамуға ықпал етеді. Абдуманноновтың жағдайымен салыстырғандағы басты айырмашылық та осында – Бектемирді бірден негізгі құрамға алды, ал Асылбекке түскен таңдау – болашақты көздеген қадам. Сондықтан одан дәл қазір жарқын ойын күту қиын. Дегенмен, Абдирасуловтың әлеуеті жоғары және ол жоғары деңгейдегі ойыншыға айнала алады», – деді Егорычев.

«Оқжетпестің» 23 жасар вингері Бектемир Абдуманнонов көкшетаулық клуб сапында барлық турнирлерде 10 матч (428 минут) өткізіп, бір голмен көзге түсті.

Өз кезегінде «Астананың» 18 жасар легионері Асылбек Абдирасулов алты матчқа шығып, 77 минут ойнады.