«Томасовқа өз қалтасынан жалақы төлеп жатыр»: Мәулен – «Астанадағы» қаржылық мәселе жайлы

Қазақстандық спорт журналисі Ермұхамед Мәулен «Астана» клубындағы қаржылық мәселеге қатысты пікір білдірді, деп хабарлайды ASnews.kz.

Маусымның басталуына екі күн қалғанда «Астана» ойыншыларын тіркей бастады. Сол кезде екі жылдық келісімшарты бар немесе клубтың түлегі саналатын 12-13 футболшы ғана тіркелді. Тізімге Мақсат Абраев, Санжар Әнуаров секілді жастар енді. Ал Марин Томасов, Иван Башичтерді тіркеу үшін 100 мың теңгелік жалақы қойылды.

Естуім бойынша, Марин Томасовтың қазіргі жалақысын Саян Хамитжанов басқа бір жерден, яғни өз қалтасынан төлеп жатыр екен. Себебі клубтың шотына әлі ақша түспеген. Алдағы уақытта мәселе шешілетін шығар. Себебі «Астана» секілді клубқа бір маусым ойнап шығу үшін 2-3 миллиард теңге қажет», – деді Мәулен «Бірінші бол» ютуб-арнасына берген сұхбатында.

ҚПЛ 10-турында «Оқжетпестен» жеңілгеннен (0:1) кейін «Астананың» бас бапкері Григорий Бабаян ойыншылардың 100 мың теңгелік жалақыға ойнап жүргенін мәлімдеген еді.