ҚПЛ-да ойнаған словениялық футболшы: «Қайрат» өзіне сенуі қажет

«Атыраудың» бұрынғы жартылай қорғаушысы Якоб Новак BorodAbata.kz сайтына берген сұхбатында Чемпиондар лигасының іріктеу кезеңіндегі «Қайрат» пен словениялық «Олимпия» арасындағы матч жайлы пікірімен бөлісті.

«Әрине, «Қайраттың» мүмкіндігі бар – оларда мықты және үйлесімді команда бар, биыл да, былтыр да сенімді ойнады. «Олимпия» да мықты қарсылас, бірақ оларда өзгерістер көп болды: жаңа ойыншылар, жаңа бапкер, сондықтан ойын мәнерінің де өзгеретіні анық. «Қайрат» үшін ең бастысы – өз күшіне сену және қарсыласын төмен бағаламау», – деді Новак.

«Атыраудың» экс-ойыншысы екі команданың деңгейі бірдей болған кезде барлығын өз күшіне деген көзқарас пен сенімділік шешетінін баса айтты. Алматылықтар үшін концентрацияны сақтап, қарсылас командадағы өзгерістерге мұқият қарау маңызды.

Командалардың алғашқы кездесуі 8 шілдеде Люблянада, ал қарымта ойын 15 шілдеде Алматыда өтеді.