«Бізбен ешкім хабарласпады»: Боранбаев – 15 клубтың ҚФФ-ға жолдаған хаты туралы

«Қайраттың» қожайыны Қайрат Боранбаев ASnews.kz тілшісіне берген сұхбатында қазақстандық клубтардың төрешілік мәселесіне қатысты ҚФФ-ға жасаған үндеуіне пікір білдірді.

«Қайрат» футбол клубына хатқа қатысты ешкім хабарласқан жоқ. Бұл туралы БАҚ-тағы жарияланымдардан білдік. Бұл кімнің бастамасы екені және неліктен бізге хабарласпағаны белгісіз, сондықтан бұған түсініктеме беру қиын. Біз жүз пайыз әділ төрелік жағындамыз. Федерацияға қояр сауалдарымыз шынымен де көп, мен оны үнемі айтып жүрмін. Әр матчтан кейін төрешілікке қатысты шағымдарымызды жіберіп отырамыз», – деді Боранбаев.

Еске сала кетейік, бұған дейін қазақстандық 15 клуб (ҚПЛ-дан 13 және бірінші лигадан екі клуб) ҚФФ президенті Марат Омаровқа хат жолдаған болатын. Құжатта төрешілер корпусының жұмысына көңілі толмайтындар департамент басшысы Нуну Каштрудың отставкасын талап еткен.

Қазіргі таңда аталған үндеудің астында «Қайрат», «Ақтөбе» және «Оқжетпес» клубтарының қолдары жоқ екені белгілі.