«Тек атақпен үстемдік орнату мүмкін емес»: «Лион» түлегі – Нани мен Мозес туралы

«Қайсар» мен «Шерифтің» экс-қорғаушысы Усман Н’Диайе ASnews.kz сайтына берген сұхбатында Луиш Нани мен Виктор Мозестің қазақ футболына келуі қаншалықты әсер еткенін бағалады.

«Нани немесе Виктор Мозес деңгейіндегі ойыншылар лиганың танымалдылығын арттыратыны сөзсіз. Олардың келуі БАҚ пен демеушілердің назарын аударып, жастарға қанат бітіреді. Тәртіп пен тәжірибе бөлісу тұрғысынан олардың ықпалы зор болуы мүмкін.

Алайда, алаңдағы нәтижеге қатысты сұрақтар бар. Көбіне мұндай ойыншылар мансабының соңында, физикалық күш-қуаты азайғанда келеді. Ал ҚПЛ – климаты, алаңдары мен ұзақ ұшулары бар, физикалық тұрғыдан өте ауыр лига. Техникалық жағынан олар бәрібір жоғары деңгейде қалады, бірақ бұл бұрынғыдай үстемдік орнатуға кепілдік бермейді. Лига тек «үлкен есімдердің» есебінен тұрақты дами алмайды. Сізге ойын уақыты берілетін өз түлектеріңізден құралған мықты іргетас керек», – деді Н’Диайе.

Еске салайық, Луиш Нани «Ақтөбе» сапында барлық турнирлерде сегіз матч өткізіп, небәрі бір нәтижелі пас берді. Ал Виктор Мозестің «Қайсар» үшін өткізген бес кездесуінде әзірге нәтижелі іс-әрекеті жоқ.

Усман Кардинал Н’Диайе – француздық «Лион» клубының түлегі. 2021 жылы қорғаушы қызылордалық «Қайсар» сапында өнер көрсетіп, Премьер-лигада 25 матч өткізді. Қазіргі таңда француз паспорты бар сенегалдық футболшы агенттік қызметпен айналысады.