«Ақтөбе» бапкері: Қырғызстанда ҚПЛ-да ойнай алатын футболшылар бар

«Ақтөбенің» бас бапкері Штефан Таркович ASnews.kz сайтына берген сұхбатында Қырғызстан футболшыларының Қазақстан премьер-лигасы клубтарын күшейте алу мүмкіндігіне қатысты сұраққа жауап берді.

«Әрине. Менің құрамадағы кезімде Одилжон Абдурахманов Қазақстанда ойнап жүрді, сондай-ақ бұған дейін де көптеген қырғыз ойыншыларының мұнда табысты өнер көрсеткенін білемін. Бұл әбден мүмкін, өйткені Қырғызстанда деңгейі жоғары футболшылар бар. Бәрі олардың жеке қасиеттері мен нақты ұсыныстарға байланысты, бірақ ондай ойыншылар нақты бар», – деді словакиялық маман.

«Ақтөбеге» тағайындалғанға дейін Штефан Таркович Қырғызстан ұлттық құрамасын басқарды (2023–2024).

Айта кетерлігі, биылғы маусымда ҚПЛ-да Қырғызстан футболының бірде-бір өкілі жоқ, десе де Қазақстан чемпионатының бүкіл тарихында көрші елден 35 ойыншы өнер көрсеткен.