«Ахматтың» экс-қорғаушысы: Ромащенко «Тобылдың» бір деммен жұмыс істегенін қалайды

Грозныйдың «Ахматында» Мирослав Ромащенконың қол астында ойнаған босниялық қорғаушы Ясмин Челикович ASnews.kz сайтына берген сұхбатында «Тобылдың» ойыншылары мен қызметкерлері жаңа бас бапкерден не күтуі керектігін айтты.

«Ромащенко – мықты бапкер және одан да жақсы адам. Ол үшін тәртіп пен жинақылықтың маңызы өте зор. Ол әрбір ойыншыдан және клубтың барлық қызметкерінен өз ісіне барынша назар аударуды талап ететініне сенімдімін. Бұл адам бүкіл клубтың бір деммен жұмыс істегенін қалайды. Ол тек жеңіске бағытталған және әр адамның бойындағы ең жақсы қасиеттерді аша біледі. Осы сәтті пайдалана отырып, оны жаңа қызметімен құттықтаймын және бар жақсылықты тілеймін», – деді Челикович.

Босниялық қорғаушы Ромащенконың жетекшілігімен «Ахмат» сапында 22 матч өткізген. Мирослав Ромащенконың өзі осы аптада ресми түрде Нұрбол Жұмасқалиевтің орнына қостанайлықтардың бас бапкері болып тағайындалды.

Маманның «сары-жасылдар» сапындағы дебюті премьер-лиганың жетінші турында өтті. Бұл матчта «Тобыл» Ақтаудың «Каспийін» 2:1 есебімен жеңді.

Бұған дейін Ромащенко туралы ҚПЛ клубтарының бұрынғы қорғаушысы Виталий Волков пікір білдірген болатын.