«Қайраттың» бұрынғы легионері – «Қайсардағы» чилилік футболшы туралы: Джонс қысымды ұмытуы керек

«Қайраттың» бұрынғы жартылай қорғаушысы және Чили құрамасының экс-ойыншысы Герсон Асеведо ASnews.kz сайтына берген сұхбатында «Қайсардағы» Томас Джонстың ойынына баға берді.

«Мен Джонсқа қысымды мүлде елемеуге кеңес берер едім. Сонда ол өзін еркін көрсетіп, Қазақстан Премьер-лигасының қарқынына тезірек бейімделеді. Оған сәттілік тілеймін. Өзім бұл керемет елде ойнағаныма қуаныштымын.

Ресейдегі кезеңнен кейін Қазақстанға бейімделу маған қиын болған жоқ. Адамдары да, қаласы да өте ұнады. Оның үстіне, латынамерикалық әріптестерімнің арқасында өзімді жайлы сезіндім», – деді «Қайраттың» бұрынғы ойыншысы.

Сондай-ақ Асеведо Литвада «Атыраудың» қазіргі бас бапкері Владимир Чебуринмен бірге жұмыс істеген кезін еске алды:

«Чебуринмен қарым-қатынасым өте жақсы болды. Біз «Судувада» бір жыл бірге жұмыс істедік, сол кезде мансабымның соңғы кезеңінен шын мәнінде ләззат алдым», – деп қосты ол.

Қаңтар айында «Қайсар» чилилік футболшы Томас Джонспен келісімшарт жасасты. 28 жастағы вингер чемпионатта алты матч өткізгенімен, әзірге нәтижелі әрекетпен көзге түскен жоқ. Қазір команда турнирлік кестеде 13-орында тұр.

Герсон Асеведо «Қайрат» сапында 2016 жылы өнер көрсеткен. Ол 16 матчта 3 гол соғып, 3 нәтижелі пас берді. Сондай-ақ Ресей Премьер-лигасында доп тепкен.