Ла Лига клубының шабуылшысы «Астана» жұлдызы туралы: Абраев – техникасы мықты ойыншы

«Леванте» академиясының шабуылшысы Алдияр Нұрғали ASnews.kz сайтына берген сұхбатында «Астананың» жаңа жұлдызы Мақсат Абраевтың прогресін атап өтті.

«Мақсаттың ҚПЛ-дың соңғы ойынында не істегенін көріп қатты қуандым. Біз «Астанада» бірге ойнағанбыз және бала кезден біргеміз. Ол – техникасы мықты футболшы әрі менің досым», – деді Қазақстан жасөспірімдер құрамасының вингері.

Еске салайық, 18 жастағы қапталдағы шабуылшы Мақсат Абраев «Елімай» қақпасына гол соғып, елордалықтардың тең нәтиже (2:2) жұлып алуына көмектесті. ҚПЛ-дың бірінші турындағы матчта ол «Жетісу» қақпасын да дәл көздеген болатын (4:1).

Айта кетейік, осы аптада Алдияр Нұрғали «Леванте» негізгі командасымен алғашқы жаттығуын өткізді. Келесі маусымда жас шабуылшы испандықтардың резервтік командасына қосылмақ.