«Президент менің кеткеніме қуанбады»: Штефан Таркович Словакиядағы жұмысын «Ақтөбеге» қалай айырбастағанын айтты

«Ақтөбе» бас бапкері Штефан Таркович ASnews.kz сайтына берген сұхбатында қазақстандық клубта жұмыс істеу үшін Словакия футбол федерациясының техникалық директоры қызметінен кетуінің егжей-тегжейімен бөлісті.

«Бұл небәрі бес күн ішінде қабылданған өте жылдам шешім болды. Егер сіз «Ақтөбе» сияқты жобада жұмыс істегіңіз келсе, іске толық берілуіңіз керек. Сондықтан маған келісімшартты бұзып, Словакия футбол федерациясының президентімен келісуге тура келді. Бұл оңай болған жоқ, өйткені ол менің кеткеніме қуана қойған жоқ. Бірақ, ақырында, мен «Ақтөбемен» ынтымақтасқым келетіні туралы шешім қабылдадым.

Алдыңғы қызметімде мен барлық спорттық бағыттарға: бапкерлерді оқыту, құрама командалар бөлімі, әйелдер құрамасы және академиялар бағытына жетекшілік еттім. Әрине, барлық ұлттық командалар үшін де жауапты болдым. Мен қазір де федерацияға ақыл-кеңесіммен көмектесе аламын ба? Әрине, солай деп үміттенемін (күліп). Бірақ барлығы оларға менің кеңестерім әлі де қажет пе, жоқ па, соған байланысты», – деп атап өтті словакиялық маман.

Еске салайық, Штефан Тарковичтің жетекшілігімен «Ақтөбе» үш ресми матч өткізіп үлгерді. ҚПЛ аясында «ақ-қызылдар» «Ұлытаумен» тең түсіп, «Каспийді» жеңді, ал ел Кубогының 1/16 финалында сырт алаңда «Арысты» 4:0 есебімен тас-талқан етті.

«Вайсспен ақылдастым»: Таркович «Ақтөбеге» келуі туралы айтты