«Өзбекстан чемпионаты – ойыншық емес»: «Елімайдың» экс-легионері деңгейлерді салыстырды

«Елімайдың» экс-шабуылшысы Фейсал Мулич ASnews.kz сайтына берген сұхбатында Асылбек Абдурасулов пен Бектемір Абдуманноновтың ҚПЛ командаларына ауысуы аясында Өзбекстан чемпионатының ерекшеліктері туралы айтып берді.

«Өкінішке қарай, мен Асылбекпен де, Бектемірмен де бірге ойнаған жоқпын, бірақ маған сеніңіздер: Өзбекстан чемпионаты – ойыншық емес. Мұндағы футбол стилі қатал, алаңда өте көп жүгіріп, допты жұлып алуға міндеттісің, сондықтан оларда Қазақстанда ешқандай қиындық туындамауы тиіс. Алла бұйыртса, өздерін жақсы қырынан көрсетеді деп үміттенемін», – деді 31 жастағы сербиялық ойыншы.

Естеріңізге сала кетейік, «Астана» «Ғазалкенттің» 18 жастағы вингері Асылбек Абдурасуловты жалға алғанын жариялады. Ал 23 жастағы Бектемір Абдуманнонов самарқандық «Динамодан» «Оқжетпеске» ауысты. Оның еншісінде көрші елдің жоғарғы дивизионында соғылған 14 гол мен 19 нәтижелі пас бар.

Шабуылшы Фейсал Мулич 2025 жылы «Елімай» сапында өнер көрсетті. Бүгінгі таңда серб ойыншысы жызақтық «Соғдиананың» намысын қорғайды, ол жаңа командасында жеті ойында үш гол соғып үлгерді.