«Қалайша табылмай жүр?»: блогер – шетелге қашып кеткен футбол басшылары туралы

Футбол маманы және блогер Рымбек Ізғали қазақстандық футбол шенеуніктерінің шетелге кетіп қалу үрдісін сынап, құзырлы органдардың жұмысына қатысты сұрақтарын қойды, деп хабарлайды ASnews.kz.

«Бізде көп жағдайда мамандар шетелге қашып кете береді. Мысалға, Давид Лорияның әкесі Григорий Лория сырт елде жүр. Оның сотында бухгалтерге айып тағылды. Бахтияр Байсейітов те қашып кетті. Әділбек Жақсыбеков те жоқ, көрінбейді. Оның қайда екенін білмейміз. Бір кісілердің айтуы бойынша, Дубайда жүр дейді», – деп бастады Ізғали.

Сондай-ақ журналист экс-басшыларды елге қайтару мәселесіндегі заң орындарының әрекетіне таңғалатынын жасырмады:

«Бірақ, басқа жағдайлар болатын болса, оларды Интерполдың желісімен тауып алып, қолына кісен салып Қазақстанға қайта алып келіп жатады. Соңғы жылдары бұндай үрдіс бар. Ал неге осындай адамдарды дәл солай таба алмайды екен? Байсейітов Түркияда жүр дейді. Қалайша оны Түркиядан таба алмай отыр?» – деді ол U-Sport подкастында.

Естеріңізге сала кетейік, 320 млн теңгеден астам қаржы жымқырды деп айыпталған «Ордабасының» экс-президенті Бақтияр Байсейітовке 2022 жылы іздеу жарияланған. Қазір ол Түркияда, оны экстрадициялау туралы сұранысқа әлі жауап келген жоқ.

Ал «Қызылжардың» бұрынғы басшысы Григорий Лория қызметінен кеткен соң, клубта қаржылық тексеріс басталып, оның Аустралияға кетіп қалғаны белгілі болды.

2018-2022 жылдары ҚФФ басқарған Әділбек Жақсыбековтің де қазір қайда екені туралы ресми ақпарат жоқ.