«Бұл бізді мықтырақ ете түсетін»: «Каспийдің» экс-легионері Ақтаудағы стадионға айтылған сынға жауап берді

Ақтаулық «Каспийдің» бұрынғы тунистік жартылай қорғаушысы Вайди Сахли ASnews.kz сайтына берген сұхбатында Қазақстан премьер-лигасындағы инфрақұрылым сапасын еске алып, ақтаулық клубтың алаңы туралы пікір білдірді.

«Алаңдардың сапасы командаға және оның бюджетіне байланысты. Сондай-ақ ауа райы да әсер етеді, сондықтан мұнда көптеген көгалдар жасанды, бірақ жалпы алғанда бәрі қалыпты болды. Біз ешқашан шағымданған емеспіз. Қазақстандағы алаңдар менің мансабымдағы ең нашары болды ма? Жоқ, олай ойламаймын. Олар ең үздігі емес екені анық, бірақ ең нашары да емес. Басқа елдерде де дәл осындай алаңдар бар», – деп бастады Сахли.

Ақтаудағы ерекше стадионның үнемі сынға ұшырауы туралы сұраққа жауап бере отырып, 28 жастағы футболшы бұл жағдай командаға сырттан келген қарсыластар алдында басымдық бергенін атап өтті:

«Сен командадан немесе футболдан тыс жүргенде сын айту оңай, бірақ, шынымды айтсам, дәл осы жағдай бізді мықтырақ ете түсетін, өйткені басқаларға біздің алаңда ойнау шынымен қиынға соғатын», – деп қорытындылады жартылай қорғаушы.

Естеріңізге сала кетейік, Вайди Сахли 2021 жылы «Каспийдің» намысын қорғаған. Ақтаулық клубта өткізген маусымда тунистік хавбек бес гол соғып, алты нәтижелі пас берді.

Қазіргі уақытта 28 жастағы ойыншы сербиялық «Раднички 1923» клубында өнер көрсетеді. Сербия Суперлигасының ағымдағы маусымында оның еншісінде 19 матч бар, онда ол төрт гол соғып, бір ассистпен көзге түсті. Футболшының трансферлік құны 400 мың еуроға бағаланып отыр.

Айта кетейік, ҚПЛ-дың биылғы маусымында алғашқы төрт турдан кейін ақтаулық «Каспийдің» қоржынында небәрі бір ғана ұпай бар.