«Ордабасы» президентінің кеңесшісі «Атыраумен» өткен матчтағы төрешілік туралы: Каштру өз жұмысын 100% атқармайды

Шымкенттік «Ордабасы» президентінің кеңесшісі Ермұхамед Мәулен «Атырауға» қарсы (1:1) матчтағы шулы төрешілікке пікір білдіріп, ҚФФ Төрелік ету және инспекциялау департаментінің директоры Нуну Каштрудың жұмысын бағалады, деп хабарлайды ASnews.kz.

«Бұл матч бойынша түрлі болжамдар болды. Бірақ түптеп келгенде, шешімді Нуну Каштру қабылдауы тиіс. Мәселе оның қаншалықты тәуелсіз тұлға екендігінде болып тұр. Өткен жылы да төрешілікке қатысты мәселелер болды, ал биылғы маусым үлкен жанжалмен басталды. Каштру көптеген функционерлермен таныс емес, қазақстандық мамандар да онымен байланысуға қорқатын шығар. Каштру матчтарға барып тұруы керек. Иә, оның білімі мен тәжірибесі бар, бірақ ол өз жұмысын 100% атқармайды», – деді Мәулен.

Шымкенттегі матчтан кейін шеттетілген төрешілерге қатысты қатаң жаза туралы сөз қозғаған функционер оларды өмір бойына шеттетудің қажеті жоқ екенін атап өтті:

«Төрешілерді өмір бойына шеттету керек пе, жоқ па – дөп басып айту қиын. Мұндай нәрсе тіпті төрешілер конвенциясында да жоқ. Оларды бірінші лигаға, екінші лигаға, жасөспірімдер чемпионаттарына жіберуге болады», – деп қосты ол.

Естеріңізге сала кетейік, ҚПЛ-дың төртінші турындағы «Ордабасы» мен «Атырау» арасындағы матч тең нәтижемен (1:1) аяқталды. Кездесу соңында бас төреші Санжар Ысқақов VAR нұсқауынан кейін шымкенттіктер қақпасына соғылған екінші голды бұзып, қосымша уақытта «Атырау» қақпасына пенальти белгіледі.

Кейінірек ҚФФ ойын нәтижесіне әсер еткен өрескел қателіктерге байланысты Ысқақов пен AVAR төрешісі Татьяна Сорокопудованы уақытша шеттеткені туралы ресми түрде мәлімдеді.