ҚПЛ экс-инспекторы: Ысқақовты өмір бойына шеттетуге болмайды

ҚПЛ бұрынғы төрешісі әрі инспекторы Серік Қошқаров ASnews.kz сайтына берген сұхбатында «Ордабасы»–«Атырау» (1:1) матчындағы төрешілікке және федерацияның төрешілерге қатысты шешіміне пікір білдірді.

«Ысқақовты өмір бойына шеттетуге болмайды. Жыл соңына дейін шеттетуге болады, бірақ қатаң шаралар қолдану дұрыс емес. Егер федерация басшылығы ауысса, төрешілерді қайтадан қайтаруы мүмкін, мұндай тәжірибе бұрын да болған. Ысқақов қателесті, бірақ бұл оның төрт турдағы төртінші матчы болғанын ескеру қажет. Оған үлкен жүктеме түсті», – деді Қошқаров.

ҚФФ-ның шеттету туралы шешіміне түсініктеме бере отырып, экс-арбитр басшылық матчтарды бөлудегі жүйелі мәселелерге назар аударуы керек екенін атап өтті:

«Басқа да төрешілер мен инспекторлар бар ғой. Матчтарға жиі тағайындала бергенде, адам өзіне өте сенімді болып, қателесу мүмкіндігі туралы ойламайтын болады. Шеттетілген төрешілерге тәжірибе жинау үшін бірінші және екінші лига матчтарын беру керек. Сонда адам өз қателерін көріп, бұлай істеуге болмайтынын түсінетін болады. Басшылық жұмыс істеп жатқанын көрсеткісі келетін сияқты. Шын мәнінде төреші емес, басшылық кінәлі. Ысқақовта шамадан тыс жүктеме болды: ол ҚПЛ-дың үш матчында бас төреші болды. ҚФФ оны жай ғана «танк астына» тастай салды», – деп атап өтті маман.

«Атыраудың» бұзылған голымен болған эпизодты талдай отырып, Қошқаров бейнекөмекшілер тарапынан бас төрешіні шатастырғанына да назар аударды:

«Ысқақов «Атыраудың» голын есептеген, бірақ оны VAR-дағы төреші шатастырды. Онда қандай қысым болғанын елестетіп көріңізші: қаншама көрермен, стадиондағы атмосфера. Сосын оған офсайд бар-жоғын тексеруді айтады. Бас арбитрді VAR-ды тексеруге шақырмас бұрын, олар 100% сенімді болуы керек. AVAR-ға жауапты төреші Алексей Долгих Ысқақовқа кедергі жасады. Оны да жазалау керек. Динамика бойынша онда ешқандай офсайд болған жоқ. Бәрі тез болды, ешкім ештеңе түсінбеді және ешкім ешкімге кедергі келтіріп, қалқалаған жоқ. Иә, түпкілікті шешімді Санжар Ысқақовтың өзі қабылдауы керек, ол мұндай сәттерді «шемішкеше шағуы» тиіс. Ол премьер-лиганың төрешісі ғой, бейнематериалдар бойынша сәттерді бірден дұрыс бағалау керек», – деп қорытындылады маман.

Естеріңізге сала кетейік, ҚПЛ-дың төртінші турындағы «Ордабасы» мен «Атырау» арасындағы матч тең нәтижемен (1:1) аяқталды. Кездесу соңында бас төреші Санжар Ысқақов VAR нұсқауынан кейін «Ордабасы» қақпасына соғылған екінші голды бұзып, қосымша уақытта «Атырау» қақпасына пенальти белгіледі.

Кейінірек ҚФФ ойын нәтижесіне әсер еткен бірқатар өрескел қателіктерге байланысты Санжар Ысқақов пен Татьяна Сорокопудованы (VAR) уақытша шеттеткені туралы ресми мәлімдеді.

Айта кетейік, Серік Қошқаров бірнеше жыл бойы ҚПЛ матчтарында төреші және инспектор болып жұмыс істеген.