«Қайрат» жартылай қорғаушысы «Астананы» жеңгені туралы: ойын сапасы жағынан ең үздік матч

Алматылық «Қайраттың» жартылай қорғаушысы Әділет Садыбеков ҚПЛ-дың төртінші турында «Астананы» (4:0) жеңген ойынды бағалады, деп хабарлайды ASnews.kz.

«Бұл биылғы маусымдағы ойын сапасы жағынан ең үздік матчымыз деп айтуға болады. Иә, «Астанадан» көптеген ойыншылар кетті, бірақ қарсыласына қиындық тудыра алатын өте жақсы жігіттер қалды», – деді Садыбеков.

Естеріңізге сала кетейік, «Қайрат» сапында Александр Мартынович пен Дастан Сәтбаев гол соқса, португалиялық шабуылшы Жоржиньо дубль авторы атанды.

Алматылықтар осы жеңістен кейін 10 ұпай жинап, турнирлік кестенің бірінші орнына шықты. «Астана» жеті ұпаймен бесінші сатыға жайғасты.