Чебурин – «Ордабасымен» болған матч жайлы: төрешінің шешімдерін талқыламаймын

«Атырау» клубының бас бапкері Владимир Чебурин «Ордабасыға» қарсы сырт алаңдағы матчты (1:1) қорытындылады, деп хабарлайды ASnews.kz.

«Бұл ойынға тыңғылықты дайындалдық. Қарсыластың деңгейін де, стадион толы болатынын да білдік. Атмосфера керемет болды, жанкүйерлер өте белсенді екен.

Ойынға келсек, қарсыластың күшті және әлсіз тұстарын ескердік. Біз олардың ойынын жан-жақты талдадық. Жігіттердің алаңдағы жанкештілігі үшін алғыс айтқым келеді – жарайсыңдар! Бүгін «Атырау» толық күшін салды. Енді келесі матчқа дайындаламыз.

Ойынның жиі тоқтауы матчтың қарқынын төмендетті. Бұл – футболдағы жағымсыз жайттардың бірі. Мұндай мәселелерді біз шешпейміз, оған арнайы мамандар жауап береді. Ал төрешілердің шешіміне келсек, мен баяғыдан бері олардың жұмысын талқыламаймын деп өз-өзіме уәде бергенмін», – деді Чебурин.

Қазақстан Премьер-лигасының төртінші турындағы кездесу Шымкентте өтіп, тең нәтижемен аяқталды – 1:1. «Мұнайшылар» 20-минутта Константин Дорофеевтің арқасында есеп ашып, ойын соңына дейін алда келе жатқан. Алайда «Ордабасы» негізгі уақытқа қосылған минуттарда жеңілістен аман қалды: 90+11-минутта Эльхан Астанов пенальтиден гол соқты.