«Ақтөбе» легионері Нанидің формасына таңқалды: 30 жастағыдай қимылдайды

«Ақтөбенің» украиналық жартылай қорғаушысы Дмитрий Топалов португалиялық вингер Нанимен бір командада ойнап, жаттығудан алған әсерімен бөлісті, деп хабарлайды ASnews.kz.

«Алғашқы аптада Нанидің менімен бір командада ойнап жүргеніне сене алмадым. Үш ай бұрын бұлай болады деп елестете де алмаушы едім. Кейін тикток, ютубқа кіріп, оның соққан голдарын көріп, қатты таңғалғанмын. Нани – басқа деңгей. Оның Роналдумен бірге ойнағаны, Фергюсонның қарамағында болғаны бірден ойға келе береді. АПЛ-ды төрт рет жеңіп алды. Жетістіктері бойынша – ол менің мансабымдағы ең үздік командаласым. Шеберлігі өте жоғары. 39 жасында ол керемет көрінеді. Мен 39 жасымда қандай болатынымды білмеймін. Бір жылдық үзіліске қарамастан, оның бабы тамаша әрі бізге көмектеседі. Иә, бұл клуб үшін маркетингтік қадам. Ол әлі келмей тұрғанда, мұншалықты ширақ болады деп ойламаппын. Артық салмағы жоқ, қимылына қарасаң, бейне бір 30 жастағыдай», – деді Топалов.

39 жастағы португалиялық Нани «Ақтөбе» сапына еркін агент ретінде қосылды. Футболшы «ақ-қызылдар» үшін толық емес үш матч өткізіп, бір нәтижелі паспен көзге түсті.

Бұған дейін вингер лиссабондық «Спортинг», ағылшындық «Манчестер Юнайтед», түркиялық «Фенербахче», испаниялық «Валенсия», италиялық «Лацио» және басқа да бірқатар клубтарда өнер көрсеткен. Португалия құрамасы сапында Нани 2016 жылғы Еуропа чемпионы атанса, «МЮ»-мен бірге Чемпиондар лигасын жеңіп, Англия Премьер-лигасында төрт рет топ жарған.