Уразбахтин – «Жетісумен» болған тең ойын туралы: мұндай матчтарды өткізу ұят

Алматылық «Қайраттың» бас бапкері Рафаэль Уразбахтин ҚПЛ-дың үшінші турындағы «Жетісумен» (0:0) тең ойыннан кейін «Хан-Тәңірі» стадионындағы көгалдың сапасын қатаң сынға алды, деп хабарлайды ASnews.kz.

«Матч алдында біз ойынды Орталық стадионда өткізуді ұсындық. «Қайрат» жалдау ақысының барлық шығынын өз мойнына алуға дайын болды. Мұндай алаңда жақсы футбол көрсеткеннен гөрі, ойынды бұзу оңайырақ. Қарсыласымыздың мақсаты да осы болған шығар. Менің түсінігімде біз бәріміз еліміздегі футболды өлтіруге емес, дамытуға ұмтылуымыз керек.

Шынымды айтсам, мұндай алаңдарда матч өткізу ұят. Тым құрығанда көгалға су шашып қойса ғой. Төрешілер бөлмесінде суаратындарын айтқан. Бірақ біз мұнда екінші ойын өткізіп жатырмыз, олар алаңды әдейі суармайды. Мен «Алтай» басшылығынан көгалды неге суармағандарын сұрадым. Олар «Қайратқа» қарсы ойнағандықтан әдейі суармаған шығар. Бұл жерде де дәл сондай жағдай сияқты. Бұл қарапайым дүниелер ғой – доп сырғанап, жылдамдық болуы үшін қажет. Ал біз футболды өз қолымызбен өлтіріп жатырмыз», – деді Уразбахтин.

Талдықорғандық «Жетісу» мен алматылық «Қайрат» арасындағы үшінші тур матчы Алматыдағы қосалқы «Хан-Тәңірі» стадионында өтіп, 0:0 есебімен тең аяқталды.

Осы ойыннан кейін «Қайрат» жеті ұпай жинап, ҚПЛ турнир кестесінде жеке-дара көш бастау мүмкіндігінен айырылды.

Еске салайық, бірінші турда алматылықтар өскемендік «Алтайға» қарсы номиналды түрдегі сырт алаңдағы матчын да осы «Хан-Тәңірі» стадионында өткізіп, 1:0 есебімен жеңіске жеткен болатын.