«Алтай» қорғаушысы «Қайратпен» өткен матч туралы: кез келген қарсыласқа қиындық тудырамыз

«Алтайдың» нигериялық қорғаушысы Самюэль Одеоибо ASnews.kz сайтына берген сұхбатында команданың маусымға дайындығы мен елдің қазіргі чемпионы – алматылық «Қайратқа» (0:1) қарсы өткен матч туралы пікір білдірді.

«Дайындық қалыпты маусымалды жиындардағыдай жақсы өтті. Иә, әрине, чемпионаттың бірінші турында біз чемпиондарға қарсы ойнадық, сондықтан олардың фаворит саналуы заңдылық. Бірақ менің ойымша, біз тәртіпке бағынып, олардың жұмысын қиындату үшін команда ретінде табанды еңбек еттік. Егер осы қарқыннан таймай, соңына дейін күрессек, кез келген командаға қиындық тудыра аламыз деп сенемін», – деді Одеоибо.

Еске салайық, ҚПЛ-дың алғашқы турында өскемендік «Алтай» минималды есеппен «Қайратқа» (0:1) жол берген болатын. Команда өзінің келесі матчын семейлік «Елімайға» қарсы өткізеді – кездесу Астанада өтеді.