Рамазан Оразов: «Тобылды» тастап кеткенім үшін Словенияда жазаландым

Қазақстан құрамасы мен даниялық «Силькеборгтың» жартылай қорғаушысы Рамазан Оразов BorodAbata.kz сайтына берген сұхбатында Словения қақпасына гол соққаннан кейінгі жағдайы мен «Тобылдан» кеткен кезін есіне алды.

– Еуропа чемпионатының іріктеу кезеңінде Словения қақпасына гол соққаннан кейін ол жақта саған деген көзқарас өзгере бастады. Сен тіпті дубль жасап, оларды Еуро-2024 додасынан қалдыра жаздадың.

– Шынымды айтсам, мен де бұл туралы ойландым және осы тақырыпты агенттіммен талқыладым. «Коперден» кеткеннен кейін олар мені барлық әлеуметтік желіде бұғаттап тастады. Бұл кәсібилікке жатпайды. Себебі олар маған одан кейін де келісімшартқа сәйкес ақша төлеу керек болды. Көп ұзамай Словения полициясы хабарласып, мені салық төлеуден жалтарып жүрсің деп айыптады. Қысқасы, олар бәрін маған жауып, кінәлі менің мойныма артты. Бұл істері дұрыс болмады. Бірақ мен мұндай жағдайға тап болған әлемдегі жалғыз адам емес шығармын.

– Сен «Тобыл» еурокубокте ойнап жатқанына қарамастан, «Коперге» ауысып кеттің. Қостанайлық клубта әлі өзіңді көрсететін мүмкіндіктер болған еді ғой.

– Иә, бұл туралы да ұзақ ойландым. Мүмкін футбол әлемі мені осы қылығым үшін жазалаған шығар. «Тобылды» маңызды сәтте тастап кеттім. Сол кезде еурокубокте жақсы келе жаттық. Топтық кезеңге шығатын мүмкіндігіміз де болды. Құрамымыз жақсы болды. Атмосфера да керемет болды. Әрқашан жақындарыма, жұбайыма «Тобылдағы» керемет кезең жайлы айтып отырамын. Бапкер команда ішінде жақсы атмосфера құра білді. Мүмкін жігіттерді, басшылықты сол кезде жерге қараттым. Осы қылығым үшін Словенияда жазаланған шығармын.