Мартин – «Ертіспен» болған тең ойын жайлы: шабуылды дұрыс түйіндей алмадық

«Ордабасы» командасының бас бапкері Андрей Мартин Павлодардың «Ертісіне» қарсы өткен ҚПЛ-дың бірінші турындағы матч жайлы (2:2) пікір білдірді, деп хабарлайды ASnews.kz.

«Менің ойымша, бұл ойын жанкүйерлерге ұнады. Гол көп болды, екі команда да жақсы ойын көрсетті. Тек шабуылдарды тиімді аяқтау жағынан сәл кемшілік байқалды. Мүмкіндіктер болды, бірақ шабуылды түйіндеу кезінде бұдан да жақсы ойнауға болар еді. Жігіттерге ешқандай өкпем жоқ, олар бүгін жақсы өнер көрсетті. Стадионды толтырып, қолдау білдірген жанкүйерлерге алғыс айтамын. Осындай қолдаудың арқасында біздің жігіттер әлі талай жақсы ойындарымен қуантады», – деді Мартин.

Шымкентте өткен кездесу 2:2 есебімен аяқталды. Алаң иелері сапында Эвертон мен Эльхан Астанов (пенальтиден) гол соқты. Ал павлодарлық командада Максим Федин мен Павел Седько көзге түсті.