Оразов – «Целеге» ауыспағаны жайлы: «Копер» мен үшін ақша сұрады

Қазақстан құрамасы мен даниялық «Силькеборгтың» жартылай қорғаушысы Рамазан Оразов неліктен «Целе» клубына ауыспағанын түсіндірді.

«Коперден» кеткеннен кейін «Целе» клубы менімен байланысқа шықты. Олардың басшылығында ресейлік адамдар, сондай-ақ Иван Маевский [«Астананың» экс-футболшысы] жұмыс істейді. Клубқа ойыным ұнаған екен, мені өздеріне шақырды. Бұл жаңалықты «Копер» естіген соң, менің трансферім үшін ақша сұрай бастады. «Целе» маған сол кезде дәл «Копердегідей» жалақы ұсынған болатын. Бірақ трансферге ақша жұмсау қажеттілігі туындағандықтан, маған ұсынған жалақысын екі есеге азайтып тастады. Маған бұл ұсыныстан бас тартуға тура келді. Өйткені отбасым бар адаммын. Қаржылық жағынан өте нашар ұсыныс болғандықтан, бұл нұсқадан бас тарттым», – 27 жастағы футболшы BorodAbata.kz сайтына берген сұхбатында.

Оразов 2023 жылдың тамызында «Копер» клубына ауысып, словениялық клубта жыл соңына дейін ойнады.