Оразов – «Коперден» кетуі туралы: бұл туралы жаңалықтардан білдім

Қазақстан құрамасы мен даниялық «Силькеборгтың» жартылай қорғаушысы Рамазан Оразов BorodAbata.kz сайтына берген сұхбатында «Коперден» кету себебін түсіндіріп берді.

– Сенің «Коперден» кетуің күтпеген жаңалық болды. Ол жақта өзіңді жақсы көрсете білдің, бірақ бас бапкер кеткеннен кейін клуб саған сенім артпай қойды.

– Иә, мен расымен де ол жаққа бас бапкердің жеке қызығушылығының арқасында ауыстым. Финляндиямен болған сырт алаңдағы матчтан кейін клубтағы бас бапкердің қызметтен кеткенін хабарлады. Оны «Олимпия» (Любляна) клубы ақша төлеп, сатып алған екен. Бұл бәріміз үшін күтпеген жаңалық болды. Осыдан кейін мен ойнауды қойдым. Ротация түгілі, мүлдем керек емес ойыншы болып қалдым.

Менің клубтан кетуім біртүрлі болып көрінді. Бұл туралы ешкімнен естімедім. Клубтан да хабарласпады. Кеткенімді тек жаңалықтардан оқып білдім. Агентім де бұдан бейхабар болған. Осы жаңалықтан кейін маған көп адамдар хабарласа бастады. Бұл жаңалықты оқып, қатты таң қалдым.

Менің сол кезде «Копермен» тағы бір жылдық келісімшартым бар еді. Сондықтан мен сол уақытқа ақша төлеуін сұрадым. Бірақ олар мен тек Словенияға барған жағдайда ғана ақша төленетінін хабарлады. Ол кезде мен ешқайда барғым келмеді. Агентіммен ойланып, үш айдың жалақысын алып, тегін кету туралы шешім қабылдадық. Клуб та бұған келісті.

27 жастағы футболшы 2023 жылдың тамызында «Копер» клубына ауысып, словениялық клубта жыл соңына дейін ойнады.