«Ордабасы» президенті ойыншылардың жалақысы туралы: олардың айлығын көргенде таңғалған жоқпын

Шымкенттік «Ордабасы» футбол клубының президенті Дархан Қызайбаев журналистердің атақты легионерлерді сатып алу мүмкіндігі мен командадағы қазіргі ойыншылардың келісімшарттары туралы сұрақтарына жауап берді, деп хабарлайды ASnews.kz.

– Клуб «Ақтөбе» немесе «Қайсар» секілді жұлдызды футболшыларды шақыруға дайын ба?

– «Ордабасы» әзірге әлемге әйгілі жұлдызды футболшыларды шақыруды жоспарлап отырған жоқ. Алайда, егер бас бапкер осындай ниет білдірсе және ол футболшы команданы шынымен күшейте алатын болса, біз оны шақыру мәселесін қарастыруға дайынбыз.

– Бокс пен футболдағы қаржының айырмашылығы жер мен көктей. Клубқа келіп, футболшылардың жалақысын көрген кезде шок болған жоқсыз ба?

– Бокс пен футболдағы қаржыны салыстырудың қажеті жоқ. Өйткені менің футболдан хабарым бар, мұнда ойыншылардың қанша табыс табатынын жақсы білдім. Клубқа келіп, олардың айлығын көрген кезде таңғалған жоқпын. Ал енді олардың жалақысы ойын деңгейіне сай ма, жоқ па – оны маусым барысында көресіздер.

Еске салайық, Қазақстан премьер-лигасының жаңа маусымындағы алғашқы ресми матчын шымкенттіктер өз алаңында өткізеді. Бірінші тур аясында «Ордабасы» павлодарлық «Ертісті» қабылдайды. Кездесу 7 наурызда өтеді.