Оксанен – «Қайратқа» ауысқаны жайында: бұл топ-команда, олар ЧЛ-да өз деңгейін көрсетті

Алматылық «Қайраттың» финляндиялық жартылай қорғаушысы Яакко Оксанен ASnews.kz сайтына берген сұхбатында өткен ойынға пікір білдіріп, жаңа клубқа бейімделуі жайлы айтты.

«Біз оқу-жаттығу жиындарын алдымен Абу-Дабиде, кейін Түркияда өткіздік. Бұл – шынымен де өте мықты команда. Сол себепті мен «Қайратқа» ауыстым. Олар Чемпиондар лигасында да өз деңгейін көрсетті.

Голға келсек, мен пенальтиден кері қайтқан допты тебуге әрдайым дайын жүремін, сондықтан бүгін, бақытымызға орай, гол соқтым. Ал Финляндияның КуПС клубында жүргенде «Қайрат» қақпасына соққан голыма келсек – футболда не боларын ешқашан білмейсің. Ол ойында біз жеңдік, ал Қазақстанда, өкінішке қарай, жеңіліп қалдық. Мұнда келгенге дейін Юкколамен таныс емес едім. Бірақ қасыңда өз отандасың болған кезде жаңа клубқа бейімделу әлдеқайда жеңіл өтеді», – деді Оксанен.

«Қайрат» пен «Тобыл» арасындағы Суперкубок ойынының негізгі уақыты 2:2 есебімен аяқталды. Ал пенальти сериясында қостанайлықтар 5:4 есебімен жеңіске жетті.