Оразов – ҚПЛ-ға оралуы жайлы: қайда жүргенің маңызды емес, ойын уақытын алу керек

Қазақстан құрамасы мен даниялық «Силькеборг» клубының жартылай қорғаушысы Рамазан Оразов BorodAbata.kz сайтына берген сұхбатында ҚПЛ-ға оралуы жайында пікір білдірді.

– Дания әлемдегі ТОП-15 чемпионаттың ішіне кіреді деп айттың. БАҚ беттерінде сенің Қазақстанға оралуың жайлы көп айтылып жүр. Біздің клубтарға сен секілді мықты қазақстандық футболшылар керек. Бірақ қазір нағыз футболдың ортасында жүрсің. Елге оралудың қажеттілігі бар ма?

– Мен қазақстандық футболшылардың шетелде көбірек ойнағанын қалаймын. «Ойнағанын» деген жерін басып айтайын. Себебі мен қазір негізгі құрамға ену үшін қанша тырыссам да, бұл ментальды тұрғыдан қиын. Көп ойнағым келеді. Негізгі құрамда соңғы рет Қазақстан құрамасының Лихтенштейнге қарсы матчында шыққан екенмін. Ойын практикасы болмағандықтан, бұл кездесуде қиналып қалдым. Қанша жаттығу жасасаң да, матчтың орнын баса алмайды. Жаңа деңгейге көтерілу үшін ойнау қажет. Қайда жүргенің маңызды емес. «Астана» ма, «Ақтөбе» ме, бәрібір. Ойын уақытын алу керек. Менің ойым осындай.

– Магомед Адиевтің кезінде сен ұлттық құраманың негізгі ойыншысы болдың. Қазір екінші рөлде қалғаныңды сезесің бе? Жаңа бапкер Әли Әлиевпен болашағың жайлы сөйлестің бе?

– Мұсаұлының кезіндегідей негізгі рөлде емес екенімді сеземін. Бірақ бұл қалыпты құбылыс. Футболда мәңгі бақи негізгі футболшы болып жүру қиын. Бұл соңғы он бес жылда тек Месси мен Роналдудың қолынан келген шығар. Кез-келген спортшының мансабында өз формасында болмайтын сәттері кездеседі. Мен мұны еш қиындықсыз қабылдаймын. Бұл менің тарапымнан болған жеңіліс емес. Қолды бір сілтей салу дұрыс болмайды. Керісінше, бұл өзімді дәлелдеуге күш-қуат береді. Мен туралы артық әңгіме айтқандардың аузын жапқым келеді.