Рамазан Оразов: Чесноков «Тобылда» қалай ойнап жүр, «Хартста» да солай ойнауы керек

Қазақстан құрамасының жартылай қорғаушысы Рамазан Оразов ASnews.kz сайтына берген сұхбатында Ислам Чесноковтың «Хартсқа» ауысуы туралы пікір білдірді.

– «Тобылда» Ислам Чесноковпен бірге ойнадың. Жақында ол «Хартс» клубына ауысайын деп жатыр. Шотландия мен Дания бір-біріне ұқсас мемлекеттер. Оған жаңа елге, чемпионатқа бейімделу оңай бола ма? Онымен бұл туралы сөйлестің бе?

– Ислам – өте жақсы, қарапайым жігіт. Бұл тақырып жайлы онымен көп сөйлестім. Ол шетелде ойнағысы келеді. Менен Словения және Дания туралы жиі сұрайтын. Тезірек шетелге кетуді көздеп отыр. Трансфер жақын арада жүзеге асады деп ойлаймын. Бұл Ислам үшін алға қарай жасалған үлкен қадам. Оны жаңа командасының бапкері де, басшылығы да көптен бері күтіп отыр. Демек, ол жақта көп нәрсе дәлелдеудің қажеті жоқ.

Бейімделу мәселесіне келсек, Ислам – өте жақсы жігіт. Оған бұл процесстен өту үшін көп нәрсе керек емес. Себебі ол өте жақсы ойыншы. Алғашқы күннен бастап өзіне сенімді болуы қажет. «Тобылда» қалай ойнап жүр, солай ойнауын жалғастырсын. Қолынан келеді деген үміттемін.