Оразов – Сәтпаев туралы: «Челсиге» жайдан-жай ауыспағаны анық

Қазақстан құрамасы мен даниялық «Силькеборг» клубының жартылай қорғаушысы Рамазан Оразов BorodAbata.kz сайтына берген сұхбатында Дастан Сәтпаев туралы пікірімен бөлісті.

– Сен «Қайрат» академиясынан шықтың. Сонда жүргеніңде Дастан туралы естідің бе? Мүмкін ол сол кездің өзінде басқалардан дараланып тұрған шығар.

– Жоқ, бұған дейін ол туралы естімедім. Қазір оның ойынын көру мен үшін өте қызықты болып тұр. Оның деңгейіне қатты таң қалдым. Мен ғана емес, бәрі аң-таң болған шығар. 16 жаста болғанына қарамастан қорықпай ойнайды. Доппен де, допсыз да.

Қазір мен ғана емес, барлығы оны бақылап отыр. «Челсиге» жайдан-жай ауыспағаны анық. Жарақат алмаса екен деймін. Өйткені Қазақстан чемпионаты физикалық тұрғыдан өте қауіпті, допқа талас кезінде қақтығыстар көп болады. Дастанға қарап, Қазақстанда да мықты жігіттер бар екеніне көзіміз жетті.