ҚПЛ-дың үш дүркін чемпионы – Вайсстың «Ақтөбеге» келуі туралы: беделді тұлға нәтижеге кепілдік бермейді

«Ақтөбенің» бұрынғы бас бапкері Владимир Муханов ASnews.kz сайтына берген сұхбатында словакиялық маман Владимир Вайсстың «ақ-қызылдардың» бас бапкері қызметіне келу мүмкіндігі туралы пікір білдірді.

«Вайсс – ойынға деген өзінің көзқарасы бар жоғары деңгейдегі маман. Әрине, ол өз тәжірибесінен «Ақтөбеге» жаңашылдық әкелер еді. Жолы бола ма, жоқ па? Оны дөп басып айту қиын. Беделді тұлғаның келуі үнемі нәтижеге кепілдік бермейді. Мен Вайссқа үлкен құрметпен қараймын. Кез келген үміткерді атаңызшы – ол не істер еді? Нәтиже қандай болатынын алдын ала болжау әрдайым өте қиын.

Бапкер жарты жыл немесе бір жыл жұмыс істегенде ғана оның нәтижесі, ойыны мен философиясы көрінеді. Сол кезде ғана бірдеңе айтуға болады. Өйткені ойынды қолда бар ойыншыларға бейімдеп құру – бір саясат. Ал нақты бір ойын үлгісін көріп, соған сай футболшыларды іріктеу әлдеқайда қиын. Вайсс бұл екі жағдайды да басынан өткерген шығар. Біз оның командаларының ойын өрнегін көрдік», – деді Муханов.

БАҚ мәліметінше, «Ақтөбе» қазіргі бапкері Николай Костовтың орнына маман іздеп жатыр. Басты үміткер – алдын ала келіссөздер жүргізіліп қойған Владимир Вайсс. Қазір словакиялық маман братиславалық «Слованмен» чемпиондық үшін таласуда, бірақ мамырдың соңына қарай босауы мүмкін. Вайсс Қазақстанда «Қайраттағы» жұмысымен танымал. Ол алматылықтармен бірге екі рет ел Кубогын, сондай-ақ ҚПЛ-дың күміс және екі дүркін қола жүлдесін жеңіп алған.

Владимир Муханов – «Ақтөбе» тарихындағы ең көп титул жеңіп алған бапкер. Ресейлік маманның жетекшілігімен «ақ-қызылдар» Қазақстан чемпионатында үш рет топ жарған, сондай-ақ ел Кубогы мен Суперкубогын иеленген.