«Ақтөбенің» бұрынғы бапкері – Нанидің келуі жайлы: тамаша пиар, бірақ іс жүзінде көреміз

«Ақтөбенің» бұрынғы бас бапкері Владимир Муханов ASnews.kz сайтына берген сұхбатында португалиялық вингер Луиш Нанидің «ақ-қызылдар» қатарына қосылуына қатысты пікір білдірді.

«Ақтөбе – мен үшін туған клуб. Иә, командада қайта құру жұмыстары жүріп жатыр. Жаңа инвестордың академия, база және басқа да барлық инфрақұрылымды салу сияқты ауқымды жоспарлары бар екенін білемін. Дегенмен, жолдың басында олар тым үлкен мақсаттарға қол созғандай көрінеді.

Нанидің ауысуына келсек, пиар-қадам ретінде бұл – тамаша шешім. Ал іс жүзінде қалай боларын дөп басып айту қиын. Бұған байыппен қараймын. Егер инвесторлар жақсы әсер қалдыру үшін командаға ақша құя алса, бұл жаман қадам емес. Бірақ Нанидің алаңда командаға қаншалықты пайда әкелетінін айту қиын», – деді Муханов.

Айта кетейік, Владимир Муханов бапкерлік мансабының басым бөлігін Қазақстанда өткізген. Ресейлік маман «Ақтөбе», «Тобыл» және елордалық «Жеңіс» сияқты клубтарды жаттықтырды. Ол ең үлкен табысқа ақтөбелік клубтың тізгінінде жетті: командамен бірге Қазақстанның үш дүркін чемпионы, Кубок иегері және Суперкубоктың екі дүркін иегері атанды.

«Манчестер Юнайтед» пен Португалия құрамасының 39 жастағы экс-вингері Луиш Нани 2026 жылдың қаңтарында ресми түрде «Ақтөбе» ойыншысы атанды. Қазақстандық клуб үшін португалиялық ойыншы бір жылдық үзілістен кейін кәсіби мансабын қайта жалғастырып, бір маусымдық келісімшартқа қол қойды.